呢幾日同我一齊走上街嘅朋友，休息傾談之間都不約而同地講：「香港原來都有幾多靚女喎！」呢句真係講出我心聲，隨便去金鐘打個轉，馬路上都會見到好多靚女：氣質型、文青型、運動型、可愛型；日系的、韓系的、長髮的、短髮的……真係各式各樣，目不睱給，根據目測，美女百分比高達「68.9%」！
深夜，我站喺馬路中心，不禁思考一個哲學性嘅問題：「到底點解咁多靚女爭取普選？靚女同爭取普選又有冇咩特別關係呢？」朋友A話：「佢哋多數住港島啩？你睇銅鑼灣一帶有幾多潮人靚女就知啦！」朋友B就話：「出得嚟嘅女仔好多都係文青，文青除咗識打扮，一般內心都有少少理想，所以咪上街囉！」
對於朋友A的解釋，我不太認同，今次嚟到現場嘅人來自大江南北，遍佈港九新界，甚至從其他國家趕返嚟，所以從地理位置去推斷，並不合理。而對於朋友B嘅看法，我部分認同，大家一定係有崇高理想同目標先上街，但就唔可以代表所有類型嘅靚女，因為仲有好多唔同Style嘅女仔。
喺呢個時候，有一個身穿運動裝，頭上敷著一片「退熱貼」嘅清純型靚女，以親切笑容問我：「要唔要食啲餅補充體力啊？我哋仲有水派喎！」我立刻接過佢手中嘅食物，連忙講聲「多謝，辛苦哂」，之後佢就繼續派物資。我打開包裝，食咗一塊梳打餅，望住頭先位靚女嘅背影，我發覺我參透咗一切－－「原來，內在美先係最重要……」
「港女」一直被標籤為貪威識食同金錢至上，好似潮文話齋－－「戇狗狗，生勾勾」咁，雖然就唔係個個女仔都係港女，但幾年內個人觀察覺得，香港女仔只係識得留喺屋企追韓劇，或者出街唱K，唔會留意社會時事。不過，經過呢幾日以來，我發覺仲有好多香港女仔係好刻苦耐勞，而且好有獨立思考能力！
各位喺街上嘅朋友，你哋有冇見過一個個靚女四周圍派物資、喺急救站駐守、幫大家噴水降溫？而喺電視機前嘅朋友，你哋又有冇見到好多女仔奮不顧身企喺最前線抗爭，不惜食咗好多「胡椒粉」同「催淚蛋」？又喺電腦螢幕前嘅朋友，你哋又有冇見到好多女仔都打下心聲，為街上嘅英雄送上送福？講到呢一刻，我覺得香港女仔真係好偉大好靚女，集勤勞、堅強、愛心於一身……
雖然「內在美比外在美重要」呢句說話依家講出嚟都俾人嫌老套，但係意味就一定永恆不變，好多香港女仔喺呢兩三個禮拜就示範出咩叫內在美。最後，我要對各位未婚男仔作出呼籲，真心一講：「識娶一定娶參與爭取普選嘅港女！」
上次〈識娶一定娶爭取普選港女！〉一文中就讚到爭取普選嘅港女們內外兼備，有如仙女下凡，係各位未婚男士嘅理想對象。有好多女性朋友睇完之後立即覺得自己「競爭力」大咗，對未來婚姻充滿信心，仲多謝我激勵佢哋，我就話唔使客氣，因為真係抵讚！唔好話大雞哥吹到天花龍鳳，其實有好多位係有客觀標準嘅，等我哋一齊睇下爭取普選港女有咩優點啦！
第一，「刻苦耐勞」。喺呢二十幾日裡面，大家一有時間都立即上街，唔少港女都著住一身運動裝，幫手搬運同分發物資、連夜駐守急救站，甚至乎企喺最前線，可謂巾幗不讓鬚眉。令人驚訝嘅係：港女們竟然會通宵留守？佢哋唔係唔沖涼唔化妝會死㗎咩？而且頂得住食餅乾、瞓馬路嘅餐風露宿生活？仲要連續十幾二十日喎……港女一向畀人身嬌肉貴唔捱得嘅形象，由此令男士們改觀。
（港男心底話：嘩，連街都瞓得，咁即係佢哋對住屋都冇咩要求啦？第時買樓都唔會話好有壓力！食嘢又唔奄尖，娶得過！……講笑啫，如果老婆有咁好一定搏命養家啦！）
第二，「躬行節儉」。所謂有力出力，有錢出錢，唔少港女寧願唱少幾次K、買少幾盒化妝品、睇少幾次泡菜仔演唱會，都平均慳番幾百蚊出嚟買物資送去補給站，真係唔話得！幾百蚊對於女仔嚟講，可以上「淘寶」買番十件衫、五對鞋，或者兩個袋滿足購物慾㗎啦！錢銀呢家嘢，應使則使，港女好多時都幾大使，而且買埋啲嘢唔等使，今次佢哋可以獻出辛辛苦苦慳返嚟嘅錢，完成大我，令人感動！
（港男心底話：佢哋依家願意為陌生嘅戰友獻上金錢，咁第日結咗婚，我話想要隻靚錶做生日禮物，佢都應該願意用私己錢買啦？娶得過！……講笑啫，如果老婆有咁好寧願留返啲錢買鑽石戒指畀佢！）
第三，「聰明伶俐」。出得嚟抗爭，唔會係蠢豬！睇吓各大正常媒體訪問港女都知，講嘢有Point，明辨大是大非，有獨立思考能力。面對旁人指責，依然解釋得有文有路，IQ同EQ俱佳，唔似得啲會食煙嘅BB喺度潑婦罵街，我夠膽講佢哋比好多坐喺「垃圾會」入面嘅屎忽鬼聰明，尤其係「痴筋」嗰啲朋友，正如林夕大師話齋──「總之有民X聯議員墊底，你們已經是傑青有餘。」
（港男心底話：不怕神一般的伯母，只怕豬一般的老婆！老婆聰明的話，第日結咗婚生個仔都聰明啲啦！娶得過！）
第四，「多才多藝」。根據觀察，唔少港女都係文青，即使瞓喺帳篷都堅持閱讀，有靈感時仲會寫吓文章抒發情懷，網上好多有關雨傘革命嘅設計圖都係出自港女玉手㗎！有啲廚藝高超嘅美女廚神仲親自下廚，整番幾道菜，煲番個靚湯，然後出旺角派街坊，滋潤各位男士嘅心靈。而睇到一班著住校裙嘅女中學生喺金鐘露天自修室溫書，唔會因抗爭而影響學習進度，真係乖女！
（港男心底話：入得廚房，出得廳堂，充滿氣質，娶得過！）
第五，「漂亮善良」。上次篇文講咗，自己睇番！
（港男心底話：不用解釋，娶得過！）
因為爭取普選港女於雨傘革命中貢獻良多，所以港女整體質素得以在2014年秋季穩步上揚，有望蜚聲國際，「港女」將會成為「優質女性」嘅代名詞！總之，一句講晒：識娶一定娶爭取普選港女！
Facebook專頁：大雞小事（https://www.facebook.com/bigchickenlittlethings ）
http://nextplus.nextmedia.com/news/nextlife/20141028/102356
沒有留言:
張貼留言