胡國興敗選感言全文

以後有緣，江湖再會！

選舉結束後，我主動去左網媒體等嘅地方同佢地見面，因為網媒冇得入場，我對所有媒體都一視同仁，亦非常尊重。我同大家講：

我誠心祝願林鄭月娥新特首，未來五年，做到佢講嘅放下成見、與眾同行。

以前做法官，我慣咗做球証。今次落場踢前鋒，要多謝家人，同競選團隊支持。我地人少少，但係好有隊形。尤其要多謝我太太，每次被人鬆肘，都有佢錫番我。

我唔在乎將來人地記得我乜野，我只係在乎要記住每一個我喺參選路上遇上嘅香港人。我尤其感激投票畀我嘅選委，佢哋無疑係最守原則，最依照良心行事嘅人，我向佢哋致敬。

我參選第一個階段的目的係ABC，已經做到。第二階段要睇以後，我建議重啟政改、22條立法、全民退保，如果最終有民意支持落實，我就超額完成。

最後我有心底說話，特別想同各位年青朋友講。記者朋友好鐘意問我：有無後悔，有無失望，覺唔覺得唔公平？我相信呢D問題，反映好多香港人而家嘅受壓抑嘅心理狀況。

我希望我呢個71歲香港人，「不含糊、不閃避」、「有話直講，勇往直前」嘅態度，多多少少可以為社會作出積極嘅示範作用。

我好鍾意我長大嘅地方－榕樹頭。個度嘅大榕樹已經全部生晒鬚，佢地每一棵都曾經係一粒小種籽。不過，每一粒種籽都能夠堅守自己嘅小陣地，幾十年後無人再可以動搖佢地。

我希望你同我，都會堅守自己嘅小陣地，喺陽光之下努力，為生命嘅理想堅持。

以後有緣，江湖再會！

https://www.thestandnews.com/politics/%E8%83%A1%E5%9C%8B%E8%88%88%E6%95%97%E9%81%B8%E6%84%9F%E8%A8%80%E5%85%A8%E6%96%87-%E4%BB%A5%E5%BE%8C%E6%9C%89%E7%B7%A3-%E6%B1%9F%E6%B9%96%E5%86%8D%E6%9C%83/