新一屆立法會議員座位表

新一屆立法會議員座位表

【明報專訊】新一屆立法會議員座位表噚日出爐，本土派議員本來想坐議事廳第一排，方便必要時抗爭，但最終6個本土同自決派新丁，包括青年新政、熱血公民，以及香港眾志等議員，都坐喺最後兩排。不過，青政兩名議員梁頌恆同游蕙禎喺財務委員會嘅會議室就坐頭排靚位，前面無遮無掩，相信必要時可直衝主席台。

梁君彥坐曾鈺成位露玄機

經民聯梁君彥就唔會同黨友一齊坐，而係坐喺主席台右邊嘅一個「死角位」，同黨友隔咗幾排。呢個「死角位」仲係上屆主席曾鈺成嘅位，換言之，梁君彥擔任立法會主席一事應無懸念。

容海恩隔開葉太田二少

民主黨、公民黨、街工，以及由泛民功能組別議員組成嘅「專業議政」，就一齊坐喺主席台左邊，公民黨楊岳橋同陳淑莊坐第一排。建制派政黨如民建聯、經民聯、自由黨同工聯會等，主要坐喺右邊同中間前排。新民黨新人容海恩就坐喺葉劉淑儀同田北辰中間，有兩個前輩左右夾實，一定唔怕出事啦。

示威常客社民連「長毛」梁國雄以前坐最後一行，今屆就調前咗兩排，同人民力量陳志全一齊坐。不過第時佢哋想「近距離」向主席或者官員表達意見，行去前面都仲有一段路喎。

陳沛然坐正中間

自稱「淺黃」嘅醫學界陳沛然，就真係坐喺「核心外圍嘅核心內圍」喇，唔止喺正會議廳中間，仲喺建制派同非建制派中間，分別與陳志全及保險界陳健波為鄰。至於被指係「西環契仔」嘅何君堯，都係夾心人，夾喺工聯會同民建聯中間。