最心悒落選者只輸3票

最心悒落選者只輸3票



【明報專訊】區選落幕，候選人拉票時成日將「一票都不能少」掛喺嘴邊，呼籲選民全家總動員投票，咁究竟一票有幾重要呢？其實今屆唔少選區當選人都只係以些微票數險勝，Emily嘗試用實例解釋畀讀者聽「一票都不能少」可以有幾關鍵。

黎熙琳再戰華富南敗選

今屆輸得最慘嘅參選人，非民主黨黎熙琳莫屬，佢第二度出選南區華富南，戲劇性地以3票之差輸畀現任區議員歐立成，分分鐘叫多戶家庭投佢一票，已經可以反超前贏咗對手。

參選黃大仙池彩區嘅工聯會/民建聯何賢輝，就輸畀對手5票，何賢輝同Emily講，「選舉唔係贏就係輸，無乜嘢」。至於輸5票係咪覺得好唔抵？佢就無奈咁話要接受現實，只怪自己做得唔夠好、唔夠足，無得怨邊個，而下一步要休息一下，再作決定。

另外，首次參選嘅中學教師梁詠詩，出戰東區筲箕灣，被空降參選嘅民建聯林心亷以15票之差擊敗，梁詠詩話賽果令佢覺得好驚訝，「初初以為有百幾二百票嘅差距落敗」，喺有限嘅人力物力下，已經比預期中輸少咗。同時，亦有資深區議員喺選戰中慘敗。服務九龍城馬頭圍多年嘅民協莫嘉嫻，輸畀對手民建聯邵天虹45票，飲恨讓出區議員席位。而多年扎根九龍城黃埔西嘅劉偉榮就以39票之差，輸畀傘兵組織青年新政嘅鄺葆賢。






























http://news.mingpao.com/pns/dailynews/web_tc/article/20151124/s00002/1448301874939