7大卡通主題餐廳 足本介紹

Posted on July 18, 2015 in 最 Hit 熱話, 玩樂, 飲食

卡通主題餐廳以往都只有出現喺日本、台灣等地，不過近幾年卡通主題餐廳喺香港就愈開愈多，繼熊本熊Café、姆明Café之後，最近有薯蛋頭先生Café、Hello Kitty Le Petit Café，間中仲會有啲pop up Café或者crossover餐廳，好似尋日喺銅鑼灣廣場2期嘅麥當勞就變身成Minions主題餐廳！既然講得係卡通主題餐廳，無論食物定裝潢都好有睇頭，真係未食先興奮，就等我哋為大家做個足本介紹啦！一於睇完去食去影，跟手緊係順便打埋卡晒命啦！

薯蛋頭先生Café

因為今個月先新開張，所以呢個7月嘅逢星期六、日都會有薯蛋頭先生抱抱會。

《Toy Story》入面嘅玩具角色各有人追捧，當第一眼看見薯蛋頭先生（Mr. Potato Head）時，你未必會鍾意佢，但睇睇下會覺得佢傻得好可愛，最搞笑係成日跌晒啲眼耳鼻，而且佢仲係一個好老公，好愛薯蛋頭太太（Mrs. Potato Head），所以好受粉絲愛戴。7月頭Izumi Curry就將屯門V City同尖沙咀Mira Mall分店改裝成Mr. Potato Head Café，薯仔加咖喱，簡直係絕妙的組合。

每張枱都有薯蛋頭夫婦公仔。

每個卡位都用薯蛋頭簾隔開。

cafe內隨處可見薯蛋頭先生嘅蹤影，當然仲有佢啲眼、耳、鼻，好搞笑！除咗布置同墊枱紙有薯蛋頭先生嘅嘜頭，每枱都會擺放由日本直送嘅薯蛋頭夫婦公仔，大家可以一邊食一邊同佢哋selfie，唔駛等隔離枱影完先到你。cafe限食90分鐘，由於仲係新開張嘅關係，日日都好多人去食，所以大家想唔駛等咁耐就記得早啲去喇！

等緊位都唔驚冇嘢做，因為cafe外有賣薯蛋頭先生嘅精品，可以去睇下有咩啱買。小編個人覺得個 iphone 6 case好靚。

張餐枱紙超靚，好想keep番張？夠膽就試下問店員肯唔肯俾多張你。

睇睇Café個餐牌，都有唔少選擇，仲要好多都有薯蛋頭先生嘅樣，啲眼耳鼻係用蔬菜、火腿等造成，如果你好想自己郁手整薯蛋頭先生個樣，就唔好錯過期間限定嘅「朱古力醬熱香餅配橙汁」，佢會附送枝裝朱古力醬，可以俾你自己DIY唧薯蛋頭個樣，邊玩邊食，大人細路都啱！

朱古力醬熱香餅配橙汁 $69

朱古力醬味道淡口，即使小朋友狂唧都冇問題。

奄列牛肉咖哩飯 $109

薯蛋頭造型原味蛋糕，另有朱古力味。 $69

唔想齋食咖喱，呢個「巨型漢堡薯角套餐」就啱晒！ $99

(左)自家製芝士牛肉薯餅飯；(右) 吉列豬扒飯，兩款均可選咖喱汁或燒汁。各$129

呢個「薯蛋頭先生限定版掛飾」只要喺埋單時，Like Izumi Curry個fan page，就可以拎到一個，每枱只限拎一個，而且數量有限，送完即止！

Mr. Potato Head Café by Izumi Curry
地址：尖沙咀彌敦道118號Mira Mall 1樓110號鋪 (即美麗華商場對面)
電話：3104 1904
營業時間：11:30am-10:00pm (最後落單時間9:30pm)

地址：屯門屯門鄉事會路83號V City商場1樓9號舖
電話：3104 1904
營業時間：11:30am-10:00pm (最後落單時間9:30pm)

Hello Kitty Le Petit Café

店面以白和灰色做主調，感覺好Elegant!

Hello Kitty做主題的餐廳、Café一啲都唔陌生，之前佐敦開咗全球首間Hello Kitty中菜廳，我哋都有報導，最近又有Hello Kitty Café開張，就係喺尖沙咀嘅Hello Kitty Le Petit Café，其實即係之前喺銅鑼灣SOGO地庫間舖仔，依家搬去尖沙咀地舖，重新裝修，而呢間店同大坑嘅Hello Kitty Secret Garden、澳門嘅Hello Kitty Obrigado係同一老闆，怪唔之得個店舖風格都有啲相似啦！

白色店面一眼望落去好pure!

同之前銅鑼灣店一樣，不設堂食，不過店面就闊好多，至少唔會好似之前喺SOGO咁同其他人一齊迫，啲食物可以拎喺手擺靚pose慢慢影都得。

店入面有個「偽」梳化位，可以俾你「挨」住同個hello kitty大嘜頭影相。

食物方面，同銅鑼灣店都有少少唔一樣。macaron加入新口味，包括櫻花、沖繩黑糖、芝士、紫薯、栗子，味道多達21款，仲有其他十幾款甜品蛋糕，部分係新調製。

21款味道嘅macaron，一次過點都試唔晒，唯有勤力啲嚟多幾次啦！$28-$30/粒

大頭Kitty雲尼拿蛋糕，另有朱古力味可供選擇。 $68/個

巧克力杯子蛋糕 $38/個

有好多蛋糕選擇，望到樣樣都想試…

大曲奇 $56/6塊、小曲奇 $108/12塊

有新食物之餘，同時保留咗之前好受歡迎嘅乳酪，連價錢都冇變。唔想食甜品嘅話，都有飲品可以選擇，如咖啡、士多啤梨梳打等。

乳酪杯有4款，呢款Tokyo Lover就有紅豆同綠茶麻糬。$48 /杯

(左) 玫瑰鮮奶咖啡 $40/杯 (右) 士多啤梨梳打 $42 /杯

依家消費滿$300，就有Hello Kitty特別版公仔1個，數量有限，換完即止。

Hello Kitty Le Petit Café
地址：尖沙咀赫德道2號地下
電話：2831 8959
營業時間：12nn-9pm

忌廉哥主題餐廳

一入門口就見到呢隻拎住條辣椒嘅忌廉哥，好搞笑！

鍾意貓嘅人對忌廉哥呢個名絕不陌生，話佢係香港最出名嘅貓，相信都冇乜人會反對，除咗拍廣告、搞慈善基金外，忌廉哥最近又有新搞作，就係同譚仔三哥crossover，開咗間忌廉哥主題餐廳。講得話係用忌廉哥做主題，店入面隨處可見忌廉哥嘅相，無論係真樣定卡通樣都一樣係cute爆！

座位與座位之間好寬敞。

擺滿忌廉哥精品、相片嘅展覽櫃

呢間譚仔三哥．忌廉哥主題餐廳有別於其他店舖的格局，用藍白作主色，而且空間感十足，枱與枱之間距離相當闊，感覺一啲都唔侷促，而一入門口嘅左手邊，內有一個擺滿忌廉哥精品、相片嘅展覽櫃，旁邊仲有一塊粉絲留言版，再望另一邊的牆身有一幅忌廉哥威水史嘅看板，記錄咗忌廉哥由出世到依家嘅大事，當然一定有令佢聲名大噪的失蹤事件啦！

可以寫低想同忌廉哥講嘅嘢

忌廉哥BB仔嗰陣嘅樣好得意！

食物方面，同一般的三哥譚仔一樣，冇特別唔同，不過餐枱紙同meun都有忌廉哥卡通，肥貓、火爆貓、為食貓、心心眼貓……小心睇到都唔記得落單。雖然食物款式冇變，但就推出咗5款一人小食，包括意川醋香番茄、手拍青瓜、大豆芽、雲耳和蓮藕，新主題店價每款$15，不過新開張有優惠，每碟$11，鍾意食小食嘅朋友就啱晒！仲有，最特別嘅係啲碗碟全部都有忌廉哥嘅樣，其他地方都冇架！

餐枱紙係四格漫畫嚟架！

餐牌好多忌廉哥呀！

揀辣度個位有噴火忌廉好搞笑！

啲碗碟都有忌廉哥個樣架！粉絲應該好想要返隻啦！

埋單走人時發現咗呢幅卡通畫，有好大隻妹妹 (忌廉嫂) 呀！

譚仔三哥．忌廉哥主題餐廳
地址：觀塘康寧道1-9號晨光大廈3樓
電話：2389 0090
營業時間：11:30am-10:30pm

Minions 麥當勞餐廳

一睇個門口已經好吸引，大大對眼望住你！

上星期成班迷你兵團喺開心樂園餐現身，當然即被搶購一空，今個星期銅鑼灣廣場2期麥當勞仲變身做Minions主題餐廳！大大隻Bob、Stuart、Kevin喺度，粉絲緊係第一時間去影相啦！

牆身當然會有minios布置啦！

全線麥當勞同McCafé都推出咗一系列Minions黃色美食，包括香蕉批、香蕉朱古力忌廉卷、新地樂等，啲凍飲全部用印有minions樣嘅透明膠杯裝住，加埋啲飲品本身啲顏色，好吸引呀！

香蕉朱古力 冷/熱 及 冰雪呂宋芒果

香蕉朱古力忌廉卷

香蕉批

眼柑柑新地樂

芒果新地筒、芒果扭紋新地筒

新地香蕉脆

脆怪分享盒

除咗Minions嘢食，仲有令人一見鍾情嘅餐具，每套有叉同羹，粉絲緊係買限量版Minions舐舐脷餐具套裝﹐，因為除咗有3套餐具，仲有個靚靚Minions兩用餐墊袋，呢個袋只得限量版套裝有。另外，24小時麥麥送同McCafé亦可換購指定餐具，所以要儲齊晒5套就要食多幾次麥當勞。

兩用餐墊袋

兩用餐墊袋 (打開)

Minions舐舐脷餐具套裝內有5張價值$10美食券

Minions 舐舐脷餐具set A 惠顧任何食品加$30即可換購1套

Minions 舐舐脷餐具set B 惠顧任何食品加$30即可換購1套

Minions 舐舐脷餐具set C 惠顧任何食品加$30即可換購1套

於24小時麥麥送惠顧任何食品滿$70，加$30元即可換購麥麥送限定Minions 舐舐脷餐具1套。

McCafé版，只需以$100，即可換購1套及4張McCafé中杯裝熱飲換領劵。

Minions 麥當勞餐廳地址：銅鑼灣駱克道463-483號銅鑼灣廣場2期地下G04號
電話：2891 3503

MOOMIN CAFÉ

餐廳外圍造型係姆明屋企。

上年年尾喺海港城LCX開嘅MOOMIN CAFÉ係首間海外店，餐廳以姆明谷為主題，同日本嘅好相似，設計以深藍色同啡色嘅田園風為主，入面除咗有好多姆明一族公仔外，仲有手繪嘅壁畫同芬蘭嘅擺設。Café嘅旁邊係姆明精品店，唔少係café限定同香港限定款式，如馬克杯同姆明公仔等。

勁多姆明公仔同你一齊用餐

餐廳入面嘅布置好北歐feel

精品店勁多小肥肥一族的角色精品，由咖啡豆、廚房用具到意大利粉都一應俱全。

既然係主題café，又點少得卡通icon嘅食物啦！café提供嘅食物大部分係北歐菜，但部分食材係由日本進口，如雞蛋、米和北海道牛奶等，聽講話日本姆明café嘅廚師會監督水準，應該睇得又食得啦！其中得香港限定姆明之家熱香餅，有3層高嘅姆明屋，入面分別有唔同嘅甜品，而且仲會贈送7層迷你熱香餅上嘅陶瓷公仔，既然得香港獨有，去到一定要試啦！

姆明之家熱香餅 $138（全日供應）餅上陶瓷公仔可以帶走 (5選1)，但價值$400嘅姆明屋就要另外買。

樹精拼盤 $130（午餐附沙律及餐湯）

芬蘭晚餐糖漬醬燉鹿肉 $160（晚餐）

自家製芝士蛋糕，有樹精同姆明兩款造型。 $88（全日供應）

三文魚芝士燒 $130（晚餐）

三文魚牛奶湯 $40

Jansson的誘惑，以姆明作者Tove Jansson命名，係以薯仔、鳳尾魚烤焗成嘅熱辣辣芬蘭經典美食。 $60（全日供應）

姆明latte $50杯（全日供應）

姆明的格拉格，係北歐傳統飲品，用野莓汁加入玉桂、杏仁、丁香等。 $48（全日供應）

MOOMIN CAFÉ地址：尖沙咀海港城海運大廈3樓LCX 32號舖
電話：2730 0963
營業時間：11am-11pm
精品店營業時間：10am-10pm

Fullhouse Signature

門口已感受到陣陣溫馨幸福味道

由於餐廳在地庫，入去前要行一條白色樓梯。

Fullhouse來自馬來西亞，以「家」為概念的卡通主題餐廳，有家庭成員爸爸Thomas、媽媽Tracy、姐姐Tiffani及弟弟Tony，餐廳裝潢及餐桌椅仿維多利亞式風格，並用水晶吊燈、古典鋼琴等作裝飾，感覺華麗，猶如童話世界。除咗係餐廳，Fullhouse同時提供婚宴服務，可以俾新手舉行婚禮等儀式。

餐廳裝潢仿維多利亞式風格

既然係以家作主題，當然唔少得俾小朋友發揮創意填色角。

店內陳列卡通精品

食物方面以星馬菜式及西菜為主，有前菜、主菜到甜品應有盡有，而且更會隨季節推出食物及飲品。

大蝦西蘭花忌廉汁闊條麵 $138

甜品拼盤 $238

加拿大T骨扒配粟米及時蔬 $278

燴原隻鮮飽魚伴炒飯及露筍 $145

蘋果金寶伴雲呢拿汁 $63

甜品拼盤 $185

夏日限定飲品 $42

Fullhouse Signature地址：尖沙咀加拿芬道25-31號國際商業信貸銀行大廈地下1A舖(河內道K11對面)
電話：2369 2813
營業時間：12nn-11pm

熊本熊Café

大大隻熊本熊喺舖頭出面，著上廚師衫都一樣係呆呆呆…

日本熊本縣人氣吉祥物熊本熊Kumamon，推廣熊本縣，國內外大受歡迎，上年年尾喺香港香港開設首間熊本熊「Kumamoto Café 」，由店面裝潢、菜式、員工制服到餐墊，到處可見Kumamon 蹤影。與薯蛋頭Café一樣同Izumi Curry Crossover，如果到依家都未食過，真係要快啲去喇！因為只會開半年至九個月，計計下都差唔多時間同香港say bye bye喇！

全店得40個座位，不過依家熱潮過咗，唔駛點排隊就食到。

一樣都有熊本熊公仔俾你影俾你抱住selfie，不過就唔係枱枱有，想要特定款就要同隔離枱交換。

食物方面，除咗招牌咖喱吉列豬扒飯之外，亦有漢堡扒、炸蝦、炸雞等，加上沙律和炒飯等洋風料理，大部分採用熊本縣食材製作，又砌成Kumamon頭樣，就連甜品都有Kumamon個樣，粉絲影相都影都手軟。

熊本產奄列吉列豬扒咖喱飯$148（套餐）

芝士漢堡扒煎蛋 $148 （套餐）

太陽蛋炸雞肉飯$138（套餐）

草莓熱香餅配迷你軟滑雪糕 $79

草莓朱古力蛋糕配迷你軟滑雪糕 $69

杏仁蛋糕配迷你軟滑雪糕 $59

cafe隔離有售賣熊本熊精品

Kumamoto Café
地址：觀塘道418號apm LG一田超市外
電話：2803 9188
營業時間：10am-11pm

Chocolate Rain

未入店舖，牆外已有大大幅璧畫。

蘑菇係Chocolate Rain故事裡面嘅重要元素，所以餐廳中央有個大大蘑菇造型的出餐枱。

Chocolate Rain係全港第一家由本地創作公仔為主題的餐廳，店內以拼布裝飾及Chocolate Rain公仔布置，充滿童真感覺，主打前衛的分子料理，由曾任米芝蓮餐廳的大廚主理，來頭一啲都唔惹小，但唔好以為價錢好貴喎！其實菜式價錢同一般餐廳差唔多，但可以食到貴死人嘅份子料理，所以真係好值得去食一次！

店內同時售賣Chocolate精品

間中會舉辦手作班

印有Chocolate Rain嘅杯碟

店內另一側售賣Chocolate Rain嘅精品，間中亦會舉行手作班，由Chocolate Rain創辦人Prudence親自教授，可以邊食邊玩邊做手作。食物方面以一個套餐價錢包前菜、主菜及甜品，價錢由$228-$298不等，亦有甜品package，價錢由$99-$268不等。

其中一道前菜，名為清新的開始。

澳洲帶子

番茄湯

法式分子焦糖燉蛋雪糕

大蝦共和國

Chocolate Rain地址：中環鴨巴甸街35號PMQ A座1樓109-113室
電話：5544 0810
營業時間：4pm-9pm (逢星期一休息)

10大米芝蓮街頭小食

昨日公佈的《米芝蓮指南香港澳門2016》，首度將掃街小食納入評審，有23間馳名小食店入選，大家熟悉的魚蛋、豬皮蘿蔔、豬腸粉、雞蛋仔和車仔麵，以至泰國和印尼小食、及西式漢堡包店都獲得青睞。以下精選10間入圍食店，睇睇佢地有咩米芝蓮級小食！

1.合益泰　腸粉魚蛋耍家

米芝蓮推介：豬腸粉、魚蛋及豬皮蘿蔔

腸粉$7/4條：腸粉本身滑溜薄身，混合甜豉油、甜醬、花生醬及芝麻食，好香口。

好代表到香港的廉價街頭小食！當中日賣8千條的腸粉以滑溜帶有米香而聞名，配以溝入豬油的甜醬和花生醬加上炒芝麻，所以特別香口。豬皮、蘿蔔亦花心思，用牛骨湯燜成；而魚蛋的咖喱汁亦是自家秘方，其他行貨店無得揮！

豬皮蘿蔔咖喱魚蛋$25：全部都用心自家製，唔係普通味精貨色可比。

合益泰小食
地址：深水埗桂林街121號地下
電話：2720 0239
營業時間：6:30am-8:30pm

2.利強記雞蛋仔　長期人龍店

米芝蓮推介：雞蛋仔及格仔餅

雞蛋仔$16/底：外脆內軟，趁熱食更會有少量軟心！

雞蛋仔近期人氣反彈，繼早前被美國甜品店製成雞蛋仔雪糕之後，又有兩間雞蛋仔店獲米芝蓮推 介！當中以北角利強店最著名，人龍不死，幾乎任何時間都要排隊！這裡的雞蛋仔焗得外脆內軟，趁熱食更會有少量軟心，即使放久了食，都依然保持外層脆口。雖 然在港九各區有多間分店，但質素依然是北角店最稳定。

焗雞蛋仔的煎鍋只有2個，即焗即賣，所以至少要等候5至10分鐘。

小店十多年來人龍不斷。

利強記
地址：北角英皇道492號（琴行街）
電話：2590 9726
營業時間：7am-11pm

3.祥興記上海生煎包　包脆肉嫩多汁

米芝蓮推介：上海生煎包及油豆腐粉絲湯

生煎包$28/4個：每十五分鐘便出爐一次，一出即被搶購一空。

2013年開業至今已有4間店，荃灣總店現在依然人氣極旺，生煎包日賣至少四五千隻，秘方是來自曾於上海名店小楊生煎工作的師傅。每個生煎包都是即時搓粉包製，餡料則由湯、半肥瘦豬肉和豬皮制成，摺口規格12摺。用來自上海的30吋巨型生煎鑊，邊煎邊焗，皮薄脆，包底煎得香脆，湯汁滿溢。

咖喱牛肉粉絲湯$22：牛骨湯底，配少少咖喱好惹味。

荃灣店門外經常有人龍。

祥興記上海生煎包
地址：荃灣川龍街13號地下
電話：6109 5735
營業時間：10am-10pm

4.十八座狗仔粉　屋邨懷舊滋味

推米芝蓮介：豬油渣麵及豬皮蘿蔔

粉仔$20（細）：約一吋長粉仔，腍滑吸晒豬骨湯底，面頭有炸過豬油、渣冬菇和蝦米。

狗仔粉簡稱「粉仔」，造型似唐狗尾巴才叫作狗仔粉；亦有說是戰時救濟機構派發這種湯粉給民眾充飢，遂以救濟粉諧音狗仔粉命名。十八座狗仔粉的店主是80後，因懷念兒時石梨貝邨吃過的狗仔粉，自行研製出用豬骨湯配炸豬油渣粉仔。至今有4間分店，而入選是佐敦分店。

枱上有菜脯任添，有辣和唔辣帶甜兩款。

佐敦店24小時營業，共有4間分店。

十八座狗仔粉
地址：佐敦白加士街120號（寧波街27號A）
電話：9360 6644
營業時間：24小時

5.叁薯　創意三式薯仔小食

米芝蓮推介：焗薯、炸薯及薯餅

壹薯$28：即三色芝士焗薯，先焗熟再釀入芝士醬、忌廉芝士和淡忌廉再焗香。

今年才在太子的創意薯仔小食店，將薯仔、番薯和紫番薯，用焗、煎、炸方式製成小食。一如店名，主打三式薯仔，包括焗薯、香煎鴨肉薯餅和香葱炒三色薯片。薯仔以外，還有其他小吃如爆糖Copper（炸饅頭配Honey comb）等。

叁薯$28：即香葱炒三色薯片。焗薯、番薯和紫番薯薄片炸成，每片約1mm。

貳薯$28：香煎鴨肉薯餅。燒鴨加上鴨油煎薯絲，做法創新又惹味。

叁薯
地址：太子水渠道30-32A號美星樓地下5號舖
電話：6432 0118/9852 1600
營業時間：12nn-9pm

6.Kelly’s Cape Bop　韓媽加料炸雞

米芝蓮推介：韓國炸雞、辣年糕、飯卷

炸雞杯$50：韓式炸雞件好惹味，還加了番薯、紫菜、番薯麵和韓國年糕，好豐富。

由韓國媽媽所開的韓式炸雞外賣店Kelly’s Cape Bop，主打炸雞、飯卷和辣年糕等，但卻不簡單，炸雞杯內除了有原味或甜辣味炸雞件，韓媽仲大加料，伴以韓式年糕、餃子、炸蕃薯和南瓜子仁，背後的意思好易明：希望大家飲食均衡。手卷即叫即包，紫菜脆口，飯軟熟，是地道韓國味道。

牛肉紫菜手卷$50：餡料有蛋、甘筍、青瓜和牛蒡絲，加上牛肉，外賣午餐之選。

外賣為主的小店號裝潢似café。

Kelly’s Cape Bop
地址：灣仔莊士頓道55-61號地下C1舖
電話：2529 9984
營業時間：11am-9pm

7.The Butchers Club Burger　重量級手製漢堡

米芝蓮推介：漢堡包和鴨油薯條

牛肉漢堡$100：每件漢堡指定160g重，煎至五成熟，肉汁最多，最濃香。

西式漢堡包店都入選！The Butchers Club Burger於去年開幕，貫徹集團品牌從頭吃到尾的精神，以澳洲黑安格斯Dry age牛扒以外的其他部位製成漢堡扒，包括用牛冧肉、頸肉、牛腩等，攪碎後每日人手以秘製醃料醃製，即點即煎。配菜鴨油薯條是以鴨油炸成，特別香口。

鴨油薯條$30(左)：是以鴨油炸成，特別香口。

The Butchers Club Burger –
地址：灣仔蘭杜街2號麗都大廈10號地舖
電話：2528 2083
營業時間：12pm-11pm

8.湯品小棧　住家味菇菌燉湯

米芝蓮推介：粵式焗湯如牛肝菌湯、松茸湯

黑松露湯米線套餐$59：以雲南黑松露熬湯，菌香濃郁，配米線食一流，套餐還包括蔬菜和玫瑰露酒雞翼。

去年開業的湯品專門店，主打菇菌燉湯，主要採用雲南黑松露、松茸、牛肝菌和茶樹菇四款乾菌，分別加入老雞豬骨湯中燉成，每款約$50。燉湯亦會配以撈米線成套餐，分別加入自製的牛肝菌醬或松茸醬，配以玫瑰露酒雞翼和蔬菜，住家風味好有心。

松茸醬撈米線$26：自家製松茸醬是用松茸、花椒油和肉碎等製成，香口惹味。

湯品小棧
地址：大角咀欅樹街20號富多來新村一期地下59A號
電話：3565 0115
營業時間：星期一至六12nn-9pm，星期日休息

9.坤記糕品　知名缽仔糕

米芝蓮推介：缽仔糕、芝麻糕、白糖糕和馬蹄糕

缽仔糕$7：米香十足，紅豆大粒，唔會過甜。

碩果僅存的舊式糕點小店，以缽仔糕、白糖糕和芝麻糕最著名，此外還有馬蹄糕、鬆糕和山茶果等鄉村風味糕點。兩代人奮鬥經營，每日新鮮人手製作糕品，即日做即日賣，質感鬆軟　味道特別好。十多年前經傳媒報道而廣為人知，人龍曾經排足一個月。

白糖糕$7/件)：清香而甜又帶微酸，疏窿是舊式白糖糕的風味。

坤記糕品
地址：深水埗福華街115-117號北河商場地下10號鋪
電話：2360　0328
營業時間：8am-11pm

10.公和荳品廠　滑溜豆腐花

米芝蓮推介：豆腐花煎釀豆腐和無糖豆漿

招牌石磨豆腐花$8：豆花滑溜，豆味濃郁。

有110年歷史的公和荳品廠，是推介中歷史最悠久的老字號，現時有兩間分店，而入選的則是深水埗分店。以豆品起家，主打豆漿和豆腐花，將浸腍了的黃豆用大石磨磨成汁，隔渣煮成豆漿，再加工製成豆腐、炸豆腐和豆卜，款式不多，近年亦應健康需求，推介少糖和無糖豆漿。

地址：深水埗北河街118號
電話：2386 6871
營業時間：7am-9pm

附錄：《米芝蓮指南2016》23間街頭美食店名單

圖片：新傳媒資料室、有關機構及Fiona